Yol polisi keçiddə yol verməyən bütün sürücüləri axtarır - VİDEO

Bakı şəhər Baş Polis İdarəsi və şəhər prokurorluğu azərbaycanlı idmançı, dağadırmanma, qayayadırmanma, buzadırmanma üzrə çempion Reyhan Məmmədovanın ölümü ilə bağlı birgə məlumat yayıb. Avtosfer.az-ın xəbərinə görə, məlumatda bildirilib ki, 28 iyun 2017-ci il tarixdə saat 21:10 radələrində Xətai rayonu ərazisində Masallı rayon sakini 1962-ci il təvəllüdlü Məmmədov Əlifağa Abdul oğlu sərxoş vəziyyətdə idarə etdiyi özünə məxsus “BMW” markalı, 90-XU-928 dövlət nömrə nişanlı avtomobillə yolu keçən piyada, 1995-ci il təvəllüdlü Məmmədova Reyhan İlqar qızını vurub, sonuncu aldığı xəsarətlərdən hadisə yerində vəfat edib. Fakta görə Xətai rayon Polis İdarəsinin İstintaq Şöbəsində Cinayət Məcəlləsinin 263-1.3-cü (yol hərəkəti və nəqliyyat vasitələrinin istismarı qaydalarını sərxoş halda pozma zərərçəkmiş şəxsin ölümünə səbəb olduqda) maddəsi ilə cinayət işi başlanıb, müvafiq ekspertizalar təyin edilib. Cinayəti törətməkdə şübhəli bilinən Ə.Məmmədov tutuub.

“Reyhan Məmmədovanın yolun piyadalar üçün nəzərdə tutulmuş hissəsindən keçərkən yol hərəkəti qaydalarını pozmuş digər sürücülərin inzibati qaydada məsuliyyətə cəlb olunmaları təmin ediləcək”, - deyə, məlumatda bildirilib.

Avtosfer.az-ın əldə etdityi məlumata görə, hadisədən az öncə piyada keçidə daxil olub və 3 avtomobilin sürücüsü ona yol verməyərək hərəkəti davam etdirib. Dördüncü avtomaşın isə Reyhan Məmmədovanı vurub. Hazırda yol polisi kamera görüntüləri əsasında ona yol verməyən digər sürücüləri axtarır.

İş üzrə zəruri istintaq tədbirləri davam etdirilir. 

Elmin