Bu gün metroda konsert olacaq
"Bakı Metropoliteni" QSC növbəti sosial layihəni gerçəkləşdirəcək. Qurumdan Avtosfer.az-a verilən məlumata görə, Milli Musiqi Günü kimi münasibətlə bu gün stansiyalarda artıq ənənə halını alan musiqili proqram təşkil olunacaq. Metropolitendən istifadə edən sərnişinlərə bayram ovqatı bəxş etmək məqsədilə sentyabrın 18-i sərnişin axını daha çox olan bir neçə stansiyanın vestibülündə konsert proqramının təşkili nəzərdə tutulub. Proqramda milli və klassik musiqi nümunələri səsləndiriləcək.
Konsert proqramı aşağıda göstərilən stansiyalarda və vaxtlarda olacaq:
- "İçərişəhər" stansiyası - saat 12:00-13:30;
- "28 May" stansiyası - saat 13:00-14:30;
- "Elmlər Akademiyası" stansiyası - saat 14:00-15:30;
- "Memar Əcəmi" stansiyası (Bənövşəyi xətt) - saat 15:00-16:30.
Qeyd edək ki, sentyabrın 18-i Azərbaycan xalqının dahi oğlu, musiqi mədəniyyətimizin korifeyi Üzeyir bəy Hacıbəyovun doğum günüdür. Bu gün Azərbaycanda həm də Milli Musiqi Günü kimi qeyd edilir.