BMW M5 yeni rekorda imza atıb
Avtodünya 23 Dekabr 2017 11:35 782 dəfə oxunub
BMW M5 yeni rekorda imza atıb
100 kilometrə qarışıq rejimdə 10,5 litr yanacaq işlədir

"Bərkgedən" BMW M5 sedanı Formula 1 yarışlarının keçirildiyi Şanxaydakı avtodromda yeni rekorda imza atıb. Avtomobil çin trekindəki dövrəni 2 dəqiqə 22,828 saniyəyə qət edərək, bu avtodroma çıxan ən sürətli seriya sedanı olub.

Rekord yürüşü zamanı avtomobilin sükanı arxasında DTM çempionu kanadalı Bruno Spenqler olub. Pis hava şəraitinə və trekin səthinin yaş olmasına baxmayaraq Spenqler Şanxay avtodromunun əvvəlki rekordunu beş saniyə yaxşılaşdırıb.  

Yeni nəsil BMW M5 sedanı bu ilin avqust təqdim edilb. "Bərkgedən" sedan 4,4-litrlik M TwinPower Turbo V8 mühərriki və Drivelogic texnologiyalı yeni səkkiz pilləli M Steptronic avtomatik ötürmələr qutusu ilə təchiz edilir. Səkkiz silindrli aqreqat 600 at qüvvəsi və 750 Nm fırlanma anı hasil edir. "Qayanar" sedan yerindən 100 km/saat həddinə 3,4 saniyəyə, 200 km/saat həddinə isə 11,1 saniyəyə sürətlənir.

Sedanın maksimal sürəti 250 km/saat həddində elektronika tərəfindən məhdudlaşdırılıb. Opsional M Driver’s Package dəstini sifariş etməklə bu həddi 305 km/saata qədər şəkmək mümkündür. Alman istehsalçısı avtomobilin 100 kilometrə qarışıq rejimdə 10,5 litr yanacaq işlətdiyini bildirib.

Yeni nəsil BMW M5 modeli M GmbH bölümü tərəfindən hazırlanmış M xDrive tam çəkiş sistemi ilə təchiz edilir. Tam çəkiş sistemi çoxdiskli mərkəzi muftaya malikdir ki, bu da mühərrikin fırlanma anını oxlar arasında optimal bölməyə imkan verir. Bundan əlavə, arxa oxda 0-dan 100 faizə kimi qapanma imkanı olan aktiv M-differensialı quraşdırılmışdır. (Auotograph)

ŞƏRH YAZ
Ad
E-mail
Şərh