Bu il kənd və qəsəbələrarası yolların tikintisi davam etdiriləcək
Azərbaycanda bu il də kənd və qəsəbələrarası avtomobil yollarının tikintisi istiqamətində genişmiqyaslı işlər aparılacaq. 2018-ci ildə uzunluğu 2 min km-dən çox kəndlərarası və qəsəbələrarası avtomobil yolu layihəsinin, habelə digər respublika əhəmiyyətli və magistral avtomobil yollarının layihələrinin icrası həyata keçiriləcək. Avtosfer.az-ın verdiyi xəbərə görə, bu barədə Azərbaycan Avtomobil Yolları Dövlət Agentliyi İdarə Heyətinin sədri Saleh Məmmədov ötən ilin yekunları və bu il qarşıda duran vəzifələrin icrasına həsr olunan iclasda məlumat verib. O, 2017-ci il ərzində Agentlik tərəfindən nəzərdə tutulan bütün respublika əhəmiyyətli, kənd və qəsəbələrarası avtomobil yolu layihələri üzrə tikinti və yenidənqurma işlərinin uğurla icra olunduğunu qeyd edərək, ümumilikdə uzunluğu 1 335 km təşkil edən yolların yenidən qurulduğunu və təmir olunduğunu bildirib.