"Nərimanov" metrosunun qarşısındakı yolda dəyişiklik edildi– FOTO-VİDEO

Prezident İlham Əliyevin tövsiyə və tapşırıqlarına əsasən, 2018-ci ildə Azərbaycan Avtomobil Yolları Dövlət Agentliyinin qarşısında duran əsas məsələlərdən biri də paytaxt Bakıda avtonəqliyyat sıxlığının azalmasına səbəb olacaq layihələrin işlənilməsi, əsas nəqliyyat arteriyaları hesab olunan və uzun müddət əsaslı şəkildə təmir olunmayan prospekt və küçələrin bərpasıdır ki, agentlik tərəfindən paytaxt yollarında bu çərçivədə genişmiqyaslı işlər aparılır.

Agentlikdən Avtosfer.az xəbər verir ki, Nəsimi və Nərimanov rayonları arasında uzanan və sözügedən rayonların əsas nəqliyyat arteriyasını təşkil edən Təbriz küçəsində bu istiqamətdə aparılan işlərin davamı olaraq artıq asfalt-beton örtüyünün döşənməsi işlərinə başlanılıb.

Belə ki, küçənin Əliyar Əliyev küçəsi ilə kəsişməsindən Ağa Nemətulla küçəsi ilə kəsişməsinədək olan hissəsində aparılan asfatlanma işləri bitmək üzrədir. Yaxın günlərdə bu hissə yeni görkəmdə vətəndaşların istifadəsinə veriləcək.

Küçənin Ağa Nemətulla və Əhməd Rəcəbli küçələri arasında yerləşən hissəsində isə hərəkətin normal təşkili üçün yeni yol ayrıcları inşa edilir, kənarlarına səki daşları düzülür. Yaxın günlərdə sözügedən hissənin də asfaltlanması işlərinə start veriləcək.

Təbriz küçəsinin uzunluğu 3.5 km, hərəkət hissəsinin eni isə ortalama 16 metr təşkil edir. 2 gediş 2 gəliş olmaqla 4 hərəkət zolaqlı küçə 1 metr enində ayrıcı zolaqla bölünür. Küçəni uzun müddət təmir olunmaması, yolun hərəkət hissəsində çökmələrə və deformasiyalara gətirib çıxarmışdı. Bu isə intensiv hərəkətə maneə yaradırdı.

Küçənin əsaslı şəkildə yenidən qurulması işləri yeraltı kommunikasiya xətlərinin çəkilişi ilə məşğul olan qurumlarla birgə aparılır. Belə ki, istismar müddəti bitmiş su və qaz xətləri yenidən çəkilir, zəruri olan yerlərdə yolun hərəkət hissəsindən kənara çıxarılır. Birgə aparılan işlər gələcəkdə yolun tez bir zamanda sıradan çıxmasının qarşısını almış olacaq.

Azərbaycan Avtomobil Yolları Dövlət Agentliyi tərəfindən aparılan yenidənqurma işləri çərçivəsində 35 min kv.m-dən çox sahədə köhnə asfalt-beton örtüyünün üst qatı frezlənərək kənara daşınıb, zəruri olan yerlərdə yararsız qrunt qazılaraq çıxarılır, əks dolğu və kipləşdirmə  işləri aparılır, yol ayrıcı və piyada səkiləri bərpa olunur, kənarlarında köhnə səki daşları sökülərək yeniləri ilə əvəz olunur. Ümumilikdə isə 10 min p-metr yeni səki daşının düzülməsi nəzərdə tutulub.

Təmir-tikinti layihəsi ilə küçə boyu mövcud köhnə yağış-kanalizasiya sistemi bərpa olunaraq işlək vəziyyətə salınacaq, zəruri yerlərdə yeni sistem qurulacaq, yeni yağış barmaqlıqları və kommunikasiya xətlərinin baxış qapaqları qoyulacaq. Sutkanın qaranlıq saatlarında küçənin normal işıqlandırılmasını təmin etmək məqsədi ilə işıqlandırma sistemi yenilənəcək, 8 yerdə avtobus dayanacaqlarının önündə xüsusi “cib”li hissələr yaradılacaq.

Küçə boyu texnoloji ardıcıllığa uyğun olaraq 2 laydan ibarət yeni asfalt-beton örtüyü döşənəndən sonra, avtonəqliyyat vasitələrinin hərəkətinin normal təşkili üçün yeni yol nişanları quraşdırılacaq, yolun üfiqi nişanlanma xətlərinin çəkilişi işləri aparılacaq.

Namiq