Azərbaycan kiçik tonnajlı avtomobillər istehsal edəcək - FOTO
Avtoxəbər 9 Fevral 2019 12:31 327 dəfə oxunub
Azərbaycan kiçik tonnajlı avtomobillər istehsal edəcək - FOTO
İlkin mərhələdə zavodda 100 nəfər işlə təmin olunacaq

Bu gün Hacıqabul Sənaye Məhəlləsində Azərbaycanın “Azərmaş” ASC-nin Rusiyanın “QAZ Qrup” ASC ilə birgə həyata keçirdiyi layihə üzrə kommersiya və xüsusi təyinatlı avtomobillərin istehsalı zavodunun təməlqoyma mərasimi keçirilib. Avtosfer.az-ın Trend-ə istinadən məlumatına görə, tədbirdə Azərbaycanın iqtisadiyyat naziri Şahin Mustafayev, "Azərmaş" ASC-nin İdarə Heyətinin sədri Emin Axundov, Rusiyanin iqtisadi inkişaf naziri Maksim Oreşkin iştirak ediblər.

Bildirilib ki, zavodda tikinti işləri növbəti ilin ortalarına qədər təhvil veriləcək, burada kiçik tonnajlı avtomobillər istehsal ediləcək. Dəyəri 14 milyon manat olan zavodun illik istehsalı 1000 avtomobil təşkil edir. İlkin mərhələdə zavodda 100 nəfər işlə təmin olunacaq.

Sonra nazirlər zavodda istehsal edilməsi nəzərdə tutulan avtomobil modelləri və Hacıqabul Sənaye Məhəlləsində sahibkarlar üçün yaradılmış şəraitlə tanış olublar.

Qeyd edək ki, ötən ilin aprel ayında Rusiyanın “QAZ Qrup” ASC və “Azərmaş” ASC arasında kiçik tonnajlı avtomobillərin Azərbaycanda yığılmasına dair uzunmüddətli əməkdaşlıq haqqında memorandum imzalanıb, noyabr ayında isə avtomobil zavoduna Hacıqabul Sənaye Məhəlləsinin iştirakçısı statusunu təsdiq edən şəhadətnamə verilib.

Hacıqabul Sənaye Məhəlləsində avtomobil istehsalı zavodunun qurulması sənaye və xidmət sahələrinin inkişafı üçün də əlverişli imkan yaradır.

QALEREYA
ŞƏRH YAZ
Ad
E-mail
Şərh