Bakıda "ölümə tələsən" sürücü avtoxuliqanlıq edərək təhlükə yaradır - VİDEO

Paytaxtın Nərimənov rayonu, Ağa Neymətula küçəsində avtoxuliqanlıq edən sürücü kameraya düşüb. Avtosfer.az xəbər verir ki, hadisə dekabrın 3-ü, saat 16:00 radələrində qeydə alınıb.

Belə ki, 10-XF-900 dövlət nömrə nişanlı, “Hyundai” markalı avtomobilin sürücüsü yüksək sürətlə, ardıcıl olaraq qoşa xəttin tələblərini pozaraq əks istiqamətli yola çıxaraq ötmə edir. Bu zaman qarşıdan gələn sürücülər üçün ciddi təhlükə yaradır.

Qeyd edək ki, İnzibati Xətalar Məcəlləsinin 327.4-cü maddəsinə əsasən 1.1, 1.3 və 1.11 üfüqi nişanlanma xətlərinin tələblərini pozmaqla nəqliyyat vasitəsini tam olaraq əks istiqamətli nəqliyyat axınının hərəkət zolağına keçirərək nəqliyyat axınına əks istiqamətdə hərəkət etməyə görə 150 manat və 4 bal cərimə tətbiq olunur.

Lakin bu təkrar və dəfələrlə edildikdə bu artıq həmin məcəllənin 511.1-ci, yəni avtoxuliqanlıq kimi dəyərləndirilə bilər. Həmin maddədə qeyd olunur ki, nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının müxtəlif üsullarla davamlı olaraq pozulması ilə müşayiət olunan qərəzli hərəkətlərə görə nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, on beş gündən bir ayadək müddətə inzibati həbs tətbiq olunur.

Vüqar Yaşaroğlu