Bakıda sürücü qayda pozan təlimçiyə qaydaları xatırlatdı; qadın isə… - VİDEO

Paytaxt küçələrindən birində qayda pozan sürücülük təlimçisi avtomobilin kamerasına düşüb. 

Avtosfer.az-ın məlumatına görə, hadisə bir müddət günorta saatlarında qeydə alınıb.

Kadrlardan göründüyü kimi, 99-XE-205 dövlət nömrə nişanlı “Mazda” markalı təlim maşını düzgün zolaqda hərəkət etmədiyi üçün sağa manevr edib və bu zaman həmin zolaqdakı avtomobil üçün qəza şəraiti yaradıb.

Görüntünü qeydə alan sürücü xanım təlimçiyə yaxınlaşaraq onun qaydanı pozduğunu ətraflı izah edib: “Yuxarıda ‘Zolaqlarda hərəkət istiqamətləri’ nişanı (5.8.1) var. Siz nişanı gördüyünüz zaman zolağı dəyişməlisiniz. Nəyə görə sol zolaqda hərəkət edib daha sonra sağa keçirsiniz? Üstəlik təlimçisiniz”.

Qadın isə qarşılığında “Tez getmək üçün” ifadəsini səsləndirib.

Sürücü qanunlara əməl edilməli olduğunu vurğuladıqda isə o, ironik şəkildə “Qoy mən qanunu pozum, siz yox” deyə cavab verib.

Qeyd edək ki, sürücülük təlimçilərinin qaydalara riayət etməsi, xüsusilə praktiki dərslərdə, həm öyrənən sürücülər üçün nümunəvi davranış, həm də yolda təhlükəsizliyin təminatı baxımından vacibdir.

Təlimçinin belə hərəkəti isə həm başqaları üçün təhlükə yaradır, həm də öyrənən sürücülərdə yanlış vərdiş formalaşdırır.

Nərmin