Binəqədidə sakinlər “KamAZ”ların səsindən yata bilmir - ŞİKAYƏT - VİDEO

Binəqədi rayonu sakinlərindən biri Avtosfer.az-a müraciət edərək Xırdalan dairəsi yaxınlığında yerləşən “Ot bazarı” kimi tanınan ərazidə mövcud problemdən şikayətlənib. Vətəndaş bildirir ki, burada yük avtomobillərinin qarajı deyilən bir ərazi var, həmin ərazidə böyük yük avtomobilləri - TIRlar, Shacmanlar, KamAzlar dayanır. Əvvəla həmin avtomobillərin bir çoxu yolun hərəkət hissəsində park edilir ki, bu da digər nəqliyyat vasitələrinin rahat hərəkətinə mane olur. Dəfələrlə həmin qarajın nümayəndələrinə, sürücülərə sakinlər tərəfindən irad bildirilsə də faydası olmayıb. Vətəndaş bildirir ki, qarajda iş səhər saat 6 radələrində başlayır, bu saatdan etibarən sürücülər maşınları işə salırlar. Əksəriyyəti vakkumla işlədiyi üçün hava yığana qədər 20-25 dəqiqə yüksək səslə işləyir, bu da pəncərəsi küçəyə tərəf olan mənzillərin sakinlərini ciddi şəkildə narahat edir. Evində xəstəsi, uşağı olan ailələr mövcud vəziyyətdən əziyyət çəkirlər. Məsələ ilə bağlı aidiyyatı qurumlara, sürücülərin özlərinə dəfələrlə müraciət olunmasına baxmayaraq nəticəsiz qalıb. Sakinlər ümid edir ki, bu müraciətdən sonra onların üzləşdiyi problem həllini tapacaq.

Nərminə Əli