Bu qaydalara əməl etməməyin sonu qəzayla nəticələnir - Sürücülərin DİQQƏTİNƏ - VİDEO

Paytaxtda qayda pozan sürücünün görüntüsü anbaan avtomobilin kamerasına düşüb.

Avtosfer.az-ın məlumatına görə, hadisə fevralın 10-da saat 12:49 radələrində Binəqədi-Mehdiabad şossesində qeydə alınıb. Belə ki, 10-NM-554 dövlət nömrə nişanlı “Tofaş” markalı avtomobilin sürücüsü güzgüyə baxmadan hərəkətə başlayıb. Bu zaman o, görüntünü qeydə alan sürücüyə qəza şəraiti yaradıb. Təhlükəylə üzləşən sürücü siqnal verərək ona xəbərdarlıq edib. Siqnal səsindən sonra azacıq sağa manevr edən “Tofaş”ın sürücüsü ardınca geriyə dönüb.

Maddi zərərlə nəticələnən yol-nəqliyyat hadisələrinin əsas səbəbi məsuliyyətsiz və ehtiyatsız davranışlarıdır. Xüsusilə, manevrə başlayan, dayanan və ya zolaq dəyişən sürücülərin qanunvericiliyin tələblərinə əməl etməməsi bu cür qəzaların artmasına səbəb olur.

"Yol hərəkəti haqqında" qanuna əsasən, sürücü hər hansı bir manevr etməzdən əvvəl dönmə işıqlarını yandırmalı, yan güzgülərdən istifadə etməli və yolun boş olduğuna əmin olmalıdır. Lakin bir çox sürücülər bu qaydalara məhəl qoymur. Nəticədə qəfil zolaq dəyişmə, düzgün siqnal vermədən dönmə halları qəzaların baş verməsinə səbəb olur.

Yol-nəqliyyat hadisələrinin sayını azaltmaq üçün hər bir sürücü yol hərəkəti qaydalarına riayət etməli, məsuliyyətli davranmalı və digər yol hərəkəti iştirakçılarının təhlükəsizliyini nəzərə almalıdır.

Nərmin