Bu sığorta betonqarışdıran maşının qəzasını 400 manat qiymətləndirir - VİDEO

Təxminən 2 ay əvvəl qəza keçirən yük avtomobilinin sürücüsü sığorta şirkətindən narazıdır.

Nəqliyyat vasitəsinə1500 manat ziyan dəysə də, şirkət məbləğin 400 manat olduğunu bildirir.

Onun sözlərinə görə, fevralın 18-də Abşeron rayonu Mehdiabad qəsəbəsi ərazisində idarə etdiyi betonqarışdıran avtomobilini qarşıdan gələn başqa bir minik maşını vurub.  Nəticədə iritonnajlı avtomobilə ziyan dəyib.

Daha sonra sürücü nəqliyyat vasitəsinin sığorta olunduğu ''Xalq Sığorta'' şirkətinə bu barədə məlumat verib. Vətəndaş iddia edir ki,  şirkətin əməkdaşı hadisə yerinə gəlməyib, avtomobilin fotosunu çəkərək ona telefon vasitəsilə göndərməsini bildirib.

Sığorta şirkətinin müəyyən etdiyi məbləğlə razılaşmadıqda isə Fikrət Həsənova təklif olunub ki, nəqliyyat vasitəsini şirkətin servis mərkəzinə aparsın. Mərkəzdən isə bildirilib ki, avtomobilin təmir edilməsi üçün 400 manatdan çox pul lazımdır.

Fikrət Həsənovun istədiyi odur ki, ya dəymiş ziyana görə 1500 manat ödənsin, ya da avtomobil şirkətin servis mərkəzində təmir edilərək saz vəziyyətə gətirilsin.

 “Xəzər Xəbər” vətəndaşın iddiaları ilə bağlı ''Xalq Sığorta'' şirkəti ilə əlaqə saxlayıb. Ancaq şirkət məsələyə heç bir münasibət bildirməyib.”