Bu yolda nişan yoxdur, amma sürücülərə cərimələr yazılır - ŞİKAYƏT - VİDEO

Bakıda yol hərəkəti qaydasını pozmayan sürücülər əsassız şəkildə cərimələndiklərini bildiriblər. Bu barədə onlar Avtosfer.az-ın qaynar xəttinə müraciət ediblər.

Belə ki, 99-GA-963 qeydiyyat nişanlı "Honda" və 99-FJ-322 qeydiyyat nişanlı "Hyundai" markalı avtomobillərin sürücüləri paytaxtın Xəzər rayonu, Mərdəkan qəsəbəsində yerləşən Sergey Yesenin küçəsində (181 nömrəli məktəbə gedən yolda) avtomobillərini park ediblər. Sürücülərin sözlərinə görə, həmin ərazidə dayanma və durmanı qadağan edən heç bir yol nişanı yoxdur. Buna baxmayaraq, hər iki sürücü İnzibati Xətalar Məcəlləsinin 346.1-ci maddəsi ilə məsuliyyətə cəlb olunub.

Sürücünün təqdim etdiyi videodan da görünür ki, sözügedən yol sahəsində dayanma və durmanı qadağan edən nişan mövcud deyil. Məsələ ilə bağlı Dövlət Yol Polisi İdarəsinə şikayət edən sürücülərə göndərilən cavab məktubunda isə inzibati xəta haqqında qərarın qanuni şəkildə tərtib olunduğu bildirilib.

Sürücülər hesab edirlər ki, nişan olmadığı halda tətbiq edilən cərimə əsassızdır və bu səbəbdən qərarın ləğv olunmasını xahiş edirlər.

Fərid