“Əzrayıla rəqib Çita” ləqəbli sürücü - Mopedi axına qarşı sürüb ölümə gedir - VİDEO

Bakı küçələrində ciddi təhlükə yaradan sürücü özünü videoya çəkərək sosial şəbəkə hesabında paylaşıb.

Avtosfer.az-ın məlumatına görə, “Çita” ləqəbli sürücü mopedlə yolda kobud qayda pozuntuları törədərək həm öz həyatına, həm də digər hərəkət iştirakçılarına qəza şəraiti yaradıb. 
Qeydə alınmış kadrlardan da göründüyü kimi, o, mütəmadi olaraq qoşa xəttin tələbini pozaraq əks istiqamətli yola çıxıb və axına qarşı hərəkət edib. Hətta sürücü qarşı tərəfdən gələn maşınlarla toqquşmaqdan son anda yayınıb. Eyni zamanda o, sürət həddini aşan avtomobillərin arasından keçərək təhlükəyə səbəb olub.   

Təəssüflə bildirək ki, sürücülər mopedlərin nömrəsiz sürülməsindən sui-istifadə edirlər. Bu cür sürücülər qəza təhlükəsi yaratmaqla yanaşı gənc nəslin nümayəndələrinə də pis örnək olurlar. Onlar “şou” xarakterli videolar çəkmək üçün ölümlə üzləşməyi gözə alırlar. Lakin belə sürücülərin sayının artması artıq mopedlərin də qeydiyyata alınaraq dövlət nömrə nişanıyla təmin edilməsini labüdləşdirir.   

Qeyd edək ki, sözegedən sürücü sosial şəbəkə hesabında “Ölülər sürətli sürür, biri də mən olacam” ifadəsini yazıb.

Nərmin