Günün bütün saatlarında tıxac olan bu küçədə yüzlərlə sürücü qayda pozur - VİDEO

Paytaxtın Nizami rayonu, Mikayıl Əliyev küçəsində hər gün yüzlərlə sürücü qayda pozur.

Avtosfer.az xəbər verir ki, "Koroğlu" metrostansiyası istiqamətində günün bütün saatlarında tıxac var. Səhər isə qarşıdakı dairədir. Dairəyə daxil olma ardıcıllığı pozulduğu üçün tıxac yaranır. Eyni zamanda tıxacı qarşı yola çıxaraq qayda pozan sürücülər böyüdür. Belə ki, gözləmək istəməyən sürücülər əks istiqamətli yola çıxaraq dairəyə tərəf irəliləyir. Sonda isə onsuz da tıxacın mənbəyi olan dairədə sıxlıq artır. Nəticədə 2 kilometr olan küçədə saatlarla tıxac yaranır. 
Qeyd edək ki, alternativ yollarda da eyni vəziyyət müşahidə olunur. Çünki Heydər Əliyev prospekti istiqamətində çıxış üçün mövcud yolların hamısı bu dairədən keçir. 
Digər yol isə Bakıxanov qəsəbəsi istiqamətindəndir ki, burda da aeroport yolu və Heydər Əliyev prospekti istiqamətində gedən yollar yenidən dairədə kəsişir. Nəticədə tıxac burda da yaranır. 

Problemin həlli üçün dairəni kiçiltmək və Mikayıl Əliyev küçəsinə Koroğlu istiqamətindən və əks tərəfdən svetofor qoymaq olar. Eyni zamanda Mehdi Abbasov küçəsindən gələnlər üçün də svetoforun qoyulması növbəlilik yaradacaq. Nəticədə saatlarla yaranan tıxacın qarşısı alına bilər.  

Fərid