“Lada” əks istiqamətə çıxıb "Qazel"lə toqquşdu; partlayışda 2 nəfər yanaraq öldü - VİDEO

Dağıstanda iki nəqliyyat vasitəsinin iştirakı ilə ağır yol qəzası baş verib.

Avtosfer.az xəbər verir ki, hadisə Novolakski rayonunda R-217 "Kavkaz" yolunun 722-ci kilometrliyində qeydə alınıb.

Belə ki, “Lada Granta” markalı avtomobilin sürücüsü yolun əks istiqamətinə çıxaraq qarşıdan gələn "Qazel"lə toqquşub.

Zərbənin təsirindən avtomobillərdə yanğın baş verib və bir müddət sonra isə "Qazel"də olan qaz balonu partlayıb.

Qəza nəticəsində “Lada”nın sürücüsü və sərnişini yanaraq ölüblər, yük maşınının sürücüsü isə ağır xəsarətlər alıb. Yaralı təcili tibbi yardım maşını ilə xəstəxanaya aparılıb.

Hadisə ilə bağlı magistral yol avtomobillərin hərəkəti üçün bağlanılıb.

Yanan nəqliyyat vasitələri söndürüldükdən sonra yolda uzaqlaşdırılıb və nəqliyyatın hərəkəti bərpa olunub.

Faktla bağlı araşdırma aparılır.

Namiq Musayev