Nasaz maşını avtobus zolağında saxlayan sürücü CƏRİMƏLƏNİB - VİDEO

Əsassız olaraq cərimələndiyini iddia edən sürücü saytımıza müraciət edərək problemini bildirib.

Avtosfer.az xəbər verir ki, sürücü bir müddət öncə paytaxtın Nizami rayonu “Neftçilər” metrosu yaxınlığında hərəkətdə olduğu zaman 90-NB-851 dövlət nömrə nişanlı “Opel Vita” markalı avtomobilin anidən söndüyü üçün yolda qaldığını deyib. O, digər nəqliyyat vaistələrinin hərəkətinə əngəl törətməmək üçün maşını itələyərək kənara - avtobus zolağına çıxardığını bildirib. Ardınca sürücü qəza işıqlarını yandıraraq avtomobilin arxa tərəfinə qəza işarəsini yerləşdirdiyini qeyd edib. Maşını çətinliklə də olsa işə sala bildiyini söyləyən sürücü daha sonra zolağı tərk edib. Lakin ona hadisədən bir neçə gün sonra noyabrın 5-də avtobus zolağına daxil olduğu üçün 2 bal və 100 manat məbləğində elektron cərimə tətbiq olunub.

Sürücü məsələylə bağlı Baş Dövlət Yol Polisi İdarəsində şikayətlərin qəbulunu həyata keçirən "Qaynar xətt"lə əlaqə saxlasa da, onun müraciətinə tutarlı cavab verilmədiyini vurğulayıb. Üzrlü səbəbdən zolağa məcbur qalaraq girdiyini iddia edən şikayətçi, təhlükəsizlik kamerasının sadəcə zolağı tərk etmə anını qeydə aldığını bildirib: “Müraciətimdə xahişim bu olub ki, zolağa girmə səbəbi aydınlaşdırılsın və üzrlü hesab edilərək elektron qərar ləğv edilsin. Yəni, mən avtobus zolağına bilərək girməmişəm, maşınım nasaz olduğu üçün daxil olmuşam. Mənə yönləndirilən 902 qaynar xəttinə zəng elədim. Onlar cavablarında qeyd etdilər ki, kamerada üçbucaq qəza işarəsi görünmür. Demək kamera lazım olmayanı görmür, yalnız zolaqda hərəkəti görür? Deyək ki, bu kamera filan rakursdan görmədi, ətrafda digər kameralar da mövcuddur. Kamera orta zolaqda qəfildən dayanan maşını da qeydə almayıb, yoldan necə çıxarılıb onu da çəkə bilməyib? Yaxşı ki, heç olmasa qəza işıqlarını zolaqdan çıxana qədər söndürməmişdim” - deyə, sürücü müraciətində qeyd edib. 

Məsələ ilə bağlı DYP-nin mövqeyini öyrənməyə çalışacağıq. 

Nərmin