DYP piyadavurmalarla bağlı dəhşətli rəqəmlər açıqlayıb real görüntüləri yaydı - VİDEO

Avtosfer TV 14 Dekabr 2023 13:32 Oxunub 4488
DYP piyadavurmalarla bağlı dəhşətli rəqəmlər açıqlayıb  real görüntüləri yaydı  - VİDEO
WhatsApp kanalımıza abunə ola bilərsiniz

Piyadaların vurulması ilə nəticələnən yol qəzalarının sayı artıb. Səbəb müxtəlif olsa da, əslində, məsuliyyətsizlik öndədir. Piyadalar üçün şəraitin olmaması da vacib məqamdır. 

Piyadaların iştirakı ilə baş verən qəzalarla bağlı Avtosfer.az-ın suallarını Baş Dövlət Yol Polisi İdarəsinin şöbə rəisi polkovnik-leytenant Rövşən Tağıyev cavablandırıb. O təəssüflə bildirib ki, son vaxtlar piyadavurma hadisələrinin sayında müəyyən qədər artım var. “İlk növbədə 11 ayın statistikasına nəzər yetirək və piyadavurma hadisələri ilə bağlı hadisələri şərh edək. Cari ildə respublika yollarında ölüm və xəsarətlə nəticələnən 1502 yol-nəqliyyat hadisəsi baş verib. Nəticədə 776 nəfər dünyasını dəyişib, 1293 nəfər isə müxtəlif dərəcəli bədən xəsarəti alıb. Ötən illə müqaisədə həm yol-nəqliyyat hadisələrinin sayında, həm də xəsarət alanların sayında azalma müşahidə olunsa da, təəssüflər olsun ki, ölüm hallarında müəyyən qədər artım var. Respublikada ümumi yol-nəqliyyat hadisələrinin 40 faizinə yaxını, paytaxt ərazisində isə 60 faizinə yaxını məhz piyadavurma hadisələridir”. 

Şöbə rəisi qeyd edib ki, ölüm halları piyadavurma ilə bağlı hadisələrə görə çoxluq təşkil edir: “Əgər piyadavurma hadisələrinin sayındakı azalmanı istədiyimiz nəticəyə gətirib çıxara bilsək, bəlkə də Azərbaycan Avropa ölkələri sırasında ən az yol-nəqliyyat hadisəsi və ölüm olan ölkələr sırasına qoşular. Piyada və sürücü məsuliyyətsizliyi, infrastrukturla bağlı problemlər hadisələrin əsas səbəblərindəndir. Belə hadisələrin qarşısını almaq üçün maarifləndirmə işləri aparılmalı və çəkindirmə vasitəsi olan cərimələr tətbiq olunmalıdır. Heç bir qurum, eləcə də Baş Dövlət Yol Polisi İdarəsi cərimələmə tərəfdarı deyil. Lakin bəzi sürücülər var ki, onlar yalnız cərimələndikdən sonra dərs çıxara bilirlər.

Bir məlumatı da diqqətə çatdırım ki, bu ilin 11 ayı ərzində respublika yollarında 26 azyaşlı piyada vurma hadisəsində dünyasını dəyişib. Bu azyaşlılar valideyinlərinin yanında həyatını itirib. Valideyinlərin diqqətsizliyi, məsuliyyətsizliyi və qayda pozması uşaqların ölümü ilə nəticələnir”. 
Rövşən Tağıyev vurğulayıb ki, Baş Dövlət Yol Polisinin təkcə paytaxt ərazisində bu il 500-ə yaxın görüş keçirilib ki, bu görüşlərin əksəriyyəti məktəblərdə baş tutub. “Azyaşlı uşaqlara yol hərəkəti qaydalarını izah edirik ki, onlar öz təhlükəsizliyini qoruya bilsinlər. Valideynin səhvinə görə azyaşlı həyatını itirirsə məncə, bu, cəmiyyət, dövlət və həmin valideyin üçün ağır faciədir”.

Nəqliyyat eksperti Elməddin Muradlı bildirib ki, bu marifləndirmə işlərinin müsbət nəticə verəcəyinə ümid edir. “Təqdim edəcəyimiz real qəza görüntülərinin özü də maarifləndirmənin bir üsuludur. Çünki biz əyani vasitələrlə bu görüntüləri təqdim edib öz şərhimizi verəcəyik”.  

Videonu təqdim edirik:

 

FOTO QALEREYA
ŞƏRH YAZ
Ad

E-mail

Şərh