Polisdən qaçan sərxoş sürücünün maşınından 3 tapança çıxdı – FOTO - VİDEO

“Saxla” xəbərdarlığına tabe olmayan sərxoş sürücü ilə polis arasında yaşanan qovalamaca avtomobilin təhlükəsizlik kamerası tərəfindən qeydə alınıb. Avtosfer.az xəbər verir ki, Türkiyənin Ədirnə şəhərində baş verən hadisənin görüntüləri sosial şəbəkədə paylaşılıb.

Belə ki, şəhər mərkəzində reyd keçirən yol polisi əməkdaşları şübhəli avtomobilə “Saxla” əmrini veriblər, lakin 44-PL-488 dövlət nömrə nişanlı avtomobilin sürücüsü A.B. polisin xəbərdarlığına tabe olmayaraq yayınmağa çalışıb. Digər hərəkət iştirakçılarına həm təhlükə, həm də maneə yaradan A.B. dəfələrlə səkilərin üzərindən aşaraq əks istiqamətə çıxmaqla hərəkətə davam edib.

Kilometrlərlə davam edən təqibdən sonra təkərləri deşilən avtomobil sonda dayandırılıb, sürücü və sərnişini saxlanılıb. Polis əməkdaşları sürücünü sərxoşluq testindən keçiriblər. Alkotesterə üfüləyən A.B. 1,46 promil şərxoş olub. Ona təxminən 40 min lirə (1856 manat) cərimə yazılıb. Bundan əlavə, avtomobildən 3 tapança da tapılıb.

Namiq Musayev