"Prado" qaz borusuna çırpıldı, ev yandı: sürücü tapılmır, vətəndaş ŞİKAYƏTÇİDİR - VİDEO

Yasamal rayon sakini Anar Hüseynov Avtosfer.az-a müraciət edərək qarşılaşdığı problemi bildirib. Vətəndaş qeyd edir ki, 2-ci Alatava, Müzəffər Həsənov küçəsi, ev 16 V-də yaşayır.

Yanvarın 7-dən 8-nə keçən gecə, saat 00:01 radələrində evdə ailə üzvləri ilə yatdıqları zaman qəfil yanğın başlayıb. Evin böyük bir hissəsi yanıb. Məlum olub ki, səbəb evin yaxınlığında qəzalı vəziyyətdə qazpaylayıcıdır. “Dəfələrlə qaz idarəsinə müraciət etsək də gəlib onu götürmədilər. Qonşuların kamerasına baxan zaman qara rəngli “Prado” markalı avtomobilin həmin qazpaylayıcı qurğuya çırpıldığı və hadisə yerindən qaçdığını gördük. Yanğının başlamasına da məhz bu səbəb olub.”

Vətəndaş deyir ki, bu günə qədər qəzanı törədən sürücü tapılmayıb. “Polis deyir ki, nömrə aydın görünmədiyi üçün sürücünü tapa bilmir. Amma yaxınlıqda təhlükəsiz şəhər kameraları da var. Hadisənin baş vermə vaxtı dəqiq bəllidir.”

Anar Hüseynov Azəriqaz-dan da şikayətçidir. “Dəfələrlə müraciət etdik ki, bu paylayıcı qəzalı vəziyyətdir. Gəlib onu götürsünlər. Amma məhəl qoyan olmadı. Gərək evimiz yanaydı.”

Vətəndaş ona dəymiş maddi ziyanın ödənmədiyindən də şikayət edir. Hadisə ilə bağlı foto və videoları təqdim edirik:

Fərid