Qaxda piyadalardan “uçmaq” tələb olunur – Keçidlər təhlükəlidir - VİDEO

Qax rayonunun mərkəzi küçələrində piyadalar təhlükə ilə üz-üzədir. Avtosfer.az xəbər verir ki, saytın rəhbəri, nəqliyyat eksperti Elməddin Muradlı piyada yolunun təhükəli olduğunu göstərən video çəkib və məsələ ilə bağlı öz fikirlərini bildirib. Qeyd edib ki, Qaxın mərkəzində - rayon İcra Hakimiyyətinin yaxınlığında - İmam Mustafayev və Azərbaycan prospektinin kəsişməsində yerləşən piyada keçidinin hər iki tərəfi yağış sularının axması üçün nəzərdə tutulan kanalla əhatə olunub. Ekspertin sözlərinə görə, avtomobil nəqliyyatı və yol təsərrüfatı bu kimi hallarda yaşlı insanları, hamilə qadınları, əlil və uşaq arabalarını düşünməlidir. Piyadaların təhlükəsizliyi üçün kanalların üzəri dəmir barmaqlıqlarla örtülməlidir. “Gecə vaxtı səki ilə gələn piyada keçiddən istifadə etmək üçün kanalın üstündən keçməlidir. Lakin belə halda piyadanın kanala düşmə ehtimalı yüksəkdir”.

Nurlan Sakitoğlu