Qəza şəraiti yaratdı, avtoxuliqanlıq edərək getdi: "Əcəb eləyirəm..." - VİDEO

Paytaxt küçələrinin birində qaydaları kobud şəkildə pozan sürücü kameraya düşüb. Avtosfer.az xəbər verir ki, 10-KX-606 dövlət nömrə nişanlı, "VAZ 2106"  markalı avtomobilin sürücüsü əvvəlcə manevr qaydalarını kobud şəkildə pozur və digər hərəkət iştirakçısına qəza şəraiti yaradır. Ardıcıl olaraq əyləcdən istifadə edərək təhlükəli vəziyyətə səbəb olur. Ona irad bildirilən zaman isə özünü haqlı çıxarmağa çalışır. 

Daha sonra avtoxuliqanlıq hərəkətlərinə start verən sürücü əks istiqamətli yola çıxır, təkərləri yerində oynadaraq səslər çıxardır və daha iki avtomobilə təhlükə yaradaraq yüksək sürətlə uzaqlaşır. Bu zaman sağ-sol hərəkətləri edərək avtoxuliqanlıq əməlinə davam edir və cəmiyyətə aşkar şəkildə hörmətsizlik nümayiş etdirir. 

Qeyd edək ki, İnzibati Xətalar Məcəlləsinin 511.1.3-cü maddəsində qeyd olunub ki, mexaniki nəqliyyat vasitəsini qəflətən sürətləndirməklə davamlı olaraq təkərlərin yolun səthi ilə sürtünməsi səslərinin çıxarılmasına və ya yolun səthində çoxsaylı təkər izlərinin buraxılmasına görə - nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, on beş gündən bir ayadək müddətə inzibati həbs tətbiq olunur.

Fərid