"TikTok"da satışa çıxarılan NÖMRƏLƏR: Polisin bazasına girilib? - VİDEO

"TikTok" sosial şəbəkəsində avtomobil dövlət qeydiyyat nişanlarını satan peyda olub.

Avtosfer.az xəbər verir ki, bir nəfər “TikTok”da canlı yayım açaraq, öz “biznes”ini nümayiş etdirib.

Həmin şəxs iddia edir ki, satışda olan və olmayan bütün maşın nömrələrini müəyyən edə bilir. O, hətta izləyicilərinə fantastik qiymətlərə nömrələr təklif edir.

Canlı yayıma yazılan rəylərdə də izləyicilər arzuladıqları nömrələri maraqlanaraq sifariş verə bilirlər.

Tiktokerin bu məlumatları hansı mənbədən əldə etdiyi isə qaranlıq qalır.

Lent.az-ın yol polisindən əldə etdiyi məlumata görə, həmin “TikTok” istifadəçisi məlumatları “avtonet.az” saytına daxil olaraq öyrənir.

Belə ki, həmin saytın dövlət qeydiyyat nişanları satılan bölməsində rayonlara məxsus seriyalarla arzulanan nömrəni axtarışa vurur və həmin nömrənin saytda olub-olmamasını dəqiqləşdirir. Yəni, bir sözlə bunun Baş Dövlət Yol Polisi İdarəsinin sistemində mövcud olan satılmayan nömrələrlə heç bir əlaqəsi yoxdur.

İzləyicilərin əksəriyyəti isə həmin şəxsin məhz DYP-nin sistemində olan yaxud artıq istifadə edilən nömrələri bildirdiyinə inanır.