Toy karvanında oyun çıxardan "07" sürücüsü həbs edildi - VİDEO

Şəkidə toy karvanında  avtoxuliqanlıq edən şəxs həbs edilib.

Avtosfer.az bir müddət əvvəl bu sürücü barədə məlumat yayıb. Yol polisi sürücü barədə araşdırma aparıb. Avtoxuliqanlıq edib yenidən özlərini sosial şəbəkələrdə paylaşmaq onlara baha başa gəlib. 
Belə ki, Cəfərzadə Fuad Sahib oğlu dostuna məxsus "VAZ 2107" markalı , 45-BL-993 dövlət qeydiyyat nişanlı avtomobilə saxta nömrə və sayrışan işıqlar bağlayaraq Şəki şəhərində toy karvanında avtomobili yüksək sürətlə idarə edərək, qarşı hərəkət zolağına çıxmaqla, təhlükəli manevrlər etməklə ötüb keçərək əyləci çəkib avtomobili yerində fırladır. Toy karvanının qarşısını kəsərək digər avtomobillərə qəza şəraiti yaradır. Öz dostları da böyük fəxarətlə onun bu hərəkətlərini mobil telefon vasitəsi ilə çəkərək sosial şəbəkələrdə paylaşıb. 
Şəki Dövlət Yol Polisi sürücünü müəyyən edərək qanunamüvafiq qaydada onun barəsində toplanmış materialı baxılması üçün məhkəməyə göndərib. Şəki rayon məhkəməsinin qərarı ilə Cəfərzadə Fuad Sahib oğlu ictimai qaydanı və əhalinin dincliyini nümayişkəranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının davamlı olaraq pozulması ilə müşayiət olunan, digər hərəkət iştirakçılarının həyat və sağlamlığına ciddi təhlükə yaradan avtoxuliqanlıq hərəkətləri etdiyi üçün sürücülük hüququ 1 il müddətinə məhdudlaşdırılmaqla, 15 gün inzibati qaydada həbs edilib.