Velosiped zolaqlarını parkinqə çevirən sürücüləri hansı cəza gözləyir? - VİDEO

Artıq bir neçə ildir ki, paytaxtda velosipedlər üçün xüsusi zolaqların çəkilməsi layihəsi icra olunur. Ötən ilin dekabrında Bakının mərkəzi küçələrində çəkilən zolaqlar velosiped və skuter sürücülərinin təhlükəsiz hərəkətini təmin edir. Lakin günün müxtəlif saatlarında bu zolaqlarda avtomobillərin park edildiyini görə bilərik.  Nəticədə zolağı zəbt edən sürücülər velosiped və skuterlərin hərəkətinə əngəl törədirlər. Hətta qaranlıqda onlar qəzaya da səbəb ola bilərlər. 
İşiqlandırdığımız məsələylə bağlı Nəsimi rayonu Mirzəağa Əliyev küçəsində qayda pozan sürücü görüntülənib.
Avtosfer.az-ın məlumatına görə, hadisə bir neçə gün əvvəl səhər saatlarında qeydə alınıb. Belə ki, velosipedçi rastlaşdığı xoşagəlməz mənzərəni çəkərək sosial şəbəkə hesabında paylaşıb. Videodan göründüyü kimi, “Toyota Prius” markalı avtomobilin sürücüsü velosiped zolağını zəbt edib. Bu zaman maneəylə qarşılaşan velosipedçi hərəkətini saxlamağa məcbur olub. Sükan arxasında əyləşən sürücü isə onun şikayətinə heç bir reaksiya bildirməyib. 
Qeyd edək ki, bu qayda pozuntusu, İnzibati Xətalar Məcəlləsinin 327-ci maddəsinin 1-ci bəndinə əsasən, eyniylə avtobus zolağında olduğu kimi, 40 manat cəriməylə nəticələnir. 

Nərmin