Yanğınla mübarizəyə əngəl olan sürücülərin maşınlarını əzmək olarmı? - FHN-dən CAVAB - VİDEO

Paytaxtın müxtəlif yerlərində fövqəladə hallar zamanı həm iaşə və məişət obyektlərinin yanğından mühafizəsi üçün, həm də yanğın söndürən maşınların su təchizatı üçün nəzərdə tutulmuş yerüstü yanğın hidrantları təşkil edilib.

Avtosfer.az xəbər verir ki, belə qurğular baş vermiş yanğınlarda təhlükənin qarşısını almaqda önəmli rola malikdir. Lakin bəzi sürücülər sanki hidrantların əhəmiyyətini anlamayıb avtomobilini onların önündə paklayır. Bu isə baş vermiş yanğının söndürülməsinə mane olur.

Xarici ölkələrin bir çoxunda belə hallarda avtomobilin şüşələrini sındırıb, su borusunu hidranta qoşurlar. Bəs ölkəmizdə yanğın zamanı yerüstü yanğın hidrantının önündə avtomobil parklanıbsa hansı tədbirlər görülür?

Fövqəladə Hallar Nazirliyindən Avtosfer.az-a bildirilib ki, qanunvericiliyin tələbinə uyğun olaraq belə hallarda aidiyyəti üzrə hüquq-mühafizə orqanlarına müraciət olunur. Yalnız müraciətdən sonra həmin nəqliyyat vasitəsi oradan götürülə bilər. Qurumdan verilən məlumata görə, belə hallar baş verməsin deyə sürücülərlə tez-tez maarifləndirici görüşlər keçirilir, mövzuyla bağlı məlumat verilir.

Hər birimiz başa düşməliyik ki, ən kiçik yanğın belə vaxtında söndürülməsə böyük təhlükəyə çevrilir. Bəzi vətəndaşların belə məsələlərə məsuliyyətsiz yanaşması ciddi problemlərdən biridir. Ümid edirik ki, sürücülər avtomobili park edərkən daha diqqətli olar.

Məhəbbət Tərlanoğlu