Yasamalda qadına mahnı qoşub avtobus zolağında oynatdılar - ANBAAN VİDEO

Bakıda yenə vətəndaşlardan birinin qeyri-adi hərəkətləri sosial şəbəkədə gündəm olub.

Avtosfer.az xəbər verir ki, paytaxtın Yasamal rayonu Abbas Mirzə Şərifzadə küçəsində qadının yolun ortasında rəqs etməsinin görüntüləri yayılıb. Şəbəkə istifadəçilərinin dediyinə görə, qadının psixoloji problemi var və o, uzun müddətdir həmin hissədə yoldan keçənlərdən pul istəyir. Vaxtaşırı ətrafdakı obyekt sahibləri, ərazi sakinləri tərəfindən mahnı qoşulur və 20-30 qəpik qarşılığında videodakı kimi oynamağa məcbur edilir.

Videodan da göründüyü kimi, qadını oynamağa təhrik etmək üçün ətrafdakılar tərəfindən musiqi qoşulub, oynamağının da görüntülərini çəkib yayıblar. Digər tərəfdən avtobus zolağında, yolun avtomobillərin hərəkəti üçün nəzərdə tutulan hissəsində bu cür hərəkətlərin nəticəsi ağır ola bilər.

Qadını yolun ortasına salıb rəqsə məcbur etmək təkcə onun hüquqlarını tapdamaq deyil, həm o qadının, həm də başqalarının həyatını təhlükəyə atmaqdır. Aidiyyəti qurumlar bu məsələni nəzarətə götürsə, cəmiyyətin təhlükəsizliyinin təminatı üçün vacib addım atmış olarlar.

Səfər