Başımıza buz düşə bilər - Sürücülərə və piyadalara xəbərdarlıq - VİDEO

Şaxtalı havalardan sonra bəzi yerlərdə yaranan sırsıralar insanlar üçün təhlükə yaradır. Yaşayış evlərinin damından və yol ötürücülərindən sallanan və uzunluğu yarım metrdən çox olan sırsıralar oradan keçən piyada və avtomobillər üçün təhlükə mənbəyi sayılır. Çünki yol ötürücüsündən sallanan yarım metrdən çox uzunluqda sırsıranın altından avtomobillər və piyadalar hərəkət edir. Bu görüntülər paytaxtın Atatürk prospekti ilə Ziya Bünyadov prospektinin kəsişməsində yerləşən yol ötürücüsündəndir. Buradan keçən avtomobillər və piyadalar təhlükə ilə üz-üzə qalırlar.

Məsələ ilə bağlı cavabdeh qurum ''Azəryolservis''dən “Xəzər Xəbər”ə bildirildi ki, problemin qarşısını almaq üçün əməkdaşlar cəlb olunub.

Şamaxı rayonuda isə mövcud problem yaşayış evlərində yaşanır. Yaşayış evlərinin damından və eyvanından sallanan sırsıralar yaxınlıqdan keçənlər, xüsusilə də uşaqlar üçün təhlükə sayılır.