Bu üsulla maşın almaq təhlükəlidir – Pulunuz bata bilər

Daxili kreditlə avtomobil alışına maraq artıb. Alıcılar avtosalonlardan və fiziki şəxslərdən ikitərəfli qaydada maşın almağa daha çox üstünlük verirlər. Lakin bu özündə bir çox riskləri daşıyır.

Avtosfer.az-ın məlumatına görə, mövzu ilə bağlı "Yeni Sabah"a danışan hüquqşünas Anar Ramazanov bildirib ki, avtosalonlardan avtomobil alışı bir neçə üsulla həyata keçirilir:

“Ümumiyyətlə, avtosalonlarda avtomobil satışı bir neçə üsulla həyata keçirilir. Birinci üsulu lizinq yoludur.

Adətən, avtomobil satan salonlar və maşın satışı ilə məşğul olan fərdi şəxslər vətəndaşın seçib bəyəndiyi avtomobili lizinq şirkətinə təqdim edirlər və avtomobil kreditləşir. Həmin avtomobil lizinq şirkətinin mülkiyyətinə keçir. Bununla bağlı əlavə xərclər, yəni əlavə qeydiyyat və rəsmiləşmə, sığorta, kasko və digər xərclər vətəndaşdan tutulur.

İkinci yol isə təcrübədə daxili kredit variantıdır. Bu zaman vətəndaşın seçdiyi avtomobil pulu, imkanı olan bir vətəndaşın adına keçirilir və avtomobilin sahibi olan şəxsə isə etibarnamə verilir. Avtomobil sahibinin borcu bitdikdən sonra isə yenidən həmin vətəndaşın adına rəsmiləşir”. 

Hüquqşünas qeyd edib ki, daxili kredit bir neçə risk daşıyır:

“Vətəndaşlar bilməlidir ki, bu yol həddən artıq risklidir. Şəxsin aldığı avtomobilin üçüncü bir şəxsin adına rəsmiləşməsi böyük hüquqi risklərə gətirib çıxara bilər və vətəndaş həmin avtomobildən birdəfəlik məhrum ola bilər. Vərəsəlik, adına rəsmləşdiyi şəxsin kredit borcu, məhkəmə öhdəlikləri, boşanma zamanı əmlakların bölünməsi kimi məsələlərdə ciddi hüquqi risklər meydana çıxa bilər.

Digər bir variantda isə alıcının qiymətdə çatmayan məbləğini banka kreditə salmaqla olur. Vətəndaşın adına kredit götürülür və həmin şəxs qalıq pulu banka ödəyir”.