DYP-dən "avtoş" açıqlaması

Azərbaycan Dillər Universitetinin tələbəsi Nicat Abdullayevin avtoxuliqanlıq etməsi sosial şəbəkələrdə və mediada geniş müzakirə mövzusudur. Avtosfer.az azvision.az-a istinadən xəbər verir ki, Bakı şəhər Baş Dövlət Yol Polis İdarəsinin ictimaiyyətlə əlaqələr şöbəsinin rəisi Vaqif Əsədov gündəmi zəbt edən məsələ ilə bağlı bildirib ki, Nicat Abdullayev 2016-cı ilin 5 ayı ərzində 3 dəfə qanunvericiliyi pozan hadisə törədib. "Nicat Abdullayev ilk dəfə yol polisi əməkdaşlarının saxlama əmrini yerinə yetirmədiyi üçün 20 sutka həbs alıb. Bundan sonra qonşuları ilə dava etdiyi üçün cəzalandırılıb. Həmin şəxs, 3-cü dəfə avtoxuliqanlıq etdiyi üçün saxlanılıb və sürücülük hüququndan məhrum edilib. Nicat Abdullayev cəmiyyətə açıq şəkildə hörmətsizlik edib və bu əməlinə görə ona 20 sutka həbs cəzası verilib”. 

V.Əsədov N.Abdullayevin atasının vəzifəli şəxs olması ilə bağlı yayılan məlumatlara da münasibət bildirib. DYP rəsmisi qeyd edib ki, kimsə kiminsə kölgəsində toxunulmaz olduğunu düşünməsin: "Nicat Abdullayev əməlini boynuna aldı. Qaydaları pozdunuğu, cəzasını çəkməyə hazır olduğu bildirdi. Yol hərəkəti haqqında qanun onu yerinə yetirmək üçündür. Heç kim bu məsələdə özünü kənara çəkməsin və toxunulmaz hesab etməsin. Bu tələblər birmənalı yerinə yetirilməlidir”.

Qeyd edək ki, "avtoş” tələbənin atasının Xarici İşlər Nazirliyində vəzifə tutduğu deyilir.