Köhnə avtomobilləri küçələrə atırlar – FOTO

Paytaxtın Suraxanı rayonunda sakinlər köhnə avtomobilləri küçələrə atırlar. 

Avtosfer.az publika.az-a istinadən xəbər verir ki, Hövsan qəsəbəsinin küçələrində istismar müddətini başa vurmuş, habelə təmirə ehtiyacı olan nəqliyyat vasitələrinin sayı artmaqdadır.

Köhnə avtomobillərin aylarla küçələrdə istifadəsiz qalması hallarına indi daha çox rast gəlinir. Əgər əvvəllər küçələrə atılmış avtomobillərin sayı 1-2 idisə, indi onların sayı 10-dan artıqdır.

Qeyd edək ki, bəzi ölkələrdə hələ ötən əsrin 60-70-ci illərində istismar müddətini başa vurmuş, köhnəlmiş avtomobillərlə bağlı nəqliyyat vasitələrinin utilizasiyası qanunu mövcuddur. Ayrı-ayrı dövlətlərdə istismara yararsız köhnə avtomobillər, texniki baxışdan keçə bilməyən nəqliyyat vasitələri çıxdaş edilir, küçələrdən yığışdırılır.

Amma respublikamızda bununla bağlı hər hansı qanun qəbul edilmədiyindən küçələrdə, həyətyanı sahələrdə, yol kənarlarında qalan istismara yararsız avtomobillərin sayı artır.