"Lamborghini"ni ağaca çırpdı: “Önəmli deyil, xeyli avtomobilim var”

Son İngiltərə çempionu “Lester”in futbolçusu Ceff Şlupp avtomobil qəzası keçirib. Avtosfer.az “qafqazinfo”ya istinadən xəbər verir ki, qanalı futbolçu yüksək sürətlə idarə etdiyi “Lamborghini M 1” markalı avtomobili ağaca çırpıb. 

Hadisənin baş verməsinə yağışlı hava səbəb olub. Belə ki, 23 yaşlı futbolçunun idarə etdiyi avtomobil sürüşərək yoldan çıxıb və yol kənarındakı ağaca çırpılıb. Hadisə nəticəsində futbolçu heç bir xəsarət almayıb. 

“The Sun”ın verdiyi məlumata görə, 190 min avro civarında qiyməti olan avtomobili yararsız hala salan oyunçu heç də üzülməyib. O, hazırda bir neçə avtomobilinin olduğunu və qəzanın önəmsiz olduğunu vurğulayıb.

Qeyd edək ki, “Lester”in prezidenti ötən il əldə edilən çempionluğa görə futbolçulara “BMW” markalı avtomobillər hədiyyə etmişdi.