Otuz min dollarlıq maşınlar 20 minə düşdü – NƏ BAŞ VERİR?

Dövlət Gömrük Komitəsindən bildirilib ki, 2025-ci ilin ilk 6 ayında Azərbaycana idxal olunan hibrid avtomobillərin sayında və ümumi dəyərində əhəmiyyətli artım müşahidə olunub. Hesabat dövründə ölkəyə 23 min 1 ədəd hibrid avtomobil gətirilib. Avtosfer.az "Bizim.Media"ya istinadən xəbər verir ki, bu göstərici ötən ilin eyni dövrü ilə müqayisədə 14 min 42 ədəd və ya 156,73 faiz çoxdur. 2024-cü ilin ilk yarısında cəmi 8 min 959 ədəd hibrid avtomobil idxal olunmuşdu. Dəyər baxımından da artım diqqətçəkicidir. Əgər 2024-cü ilin ilk 6 ayında bu tip avtomobillərin idxalına 266 milyon 126 min 470 dollar xərclənmişdisə, 2025-ci ildə bu rəqəm 472 milyon 962 min 870 dollara yüksəlib. Beləliklə, idxal dəyəri 77,72 faiz artıb. Lakin orta idxal qiymətində ciddi azalma qeydə alınıb. 2024-cü ildə 1 hibrid avtomobilin orta idxal qiyməti 29 min 705 dollar idisə, 2025-ci ildə bu göstərici 20 min 563 dollara düşüb. Bu isə 30,78 faiz ucuzlaşma deməkdir. Manatla hesablandıqda da azalma aydın görünür: əgər keçən il 1 avtomobilin idxal dəyəri 50 min 498 manat idisə, bu il bu məbləğ 34 min 957 manata düşüb. Beləliklə, hər avtomobil üzrə idxal qiyməti 15 min 541 manat ucuzlaşıb.

Bəs ucuzlaşmanın səbəbi nədir?

Suala aydınlıq gətirən Liberal İqtisadçılar Mərkəzinin sədri Akif Nəsirli deyib ki, bütün dünyada elektromobillərin və hibrid avtomobillərin maya dəyəri durmadan aşağı düşür:

“Çünki bu avtomobillər ciddi konstruksiyaya, mühərrikə malik deyil. Bir akkumlyatordur, bir də elektrik mühərriki. Ona görə də maya dəyər getdikcə optimalllaşdırılır.Maya dəyər aşağı düşdükcə təbii ki, bu avtomobillərin satış qiyməti də ucuzlaşır. Təsadüfi deyil ki, son 6 ayda ölkəmizə idxal edilən elektron və hibrid avtomobillərin qiyməti 30 faiz aşağı düşüb. Bu ucuzlaşma bir qədər də davam edəcək. Və bu ucuzlaşma benzin və dizellə işləyən avtomobillərin populyarlığını xeyli zəiflədəcək”. 

Dünya avtomobil sənayesində bir inqilab gözlənilir. Müsahibimiz qeyd edib ki, əhalinin bütün təbəqələri üçün yeni avtomobillərin əlçatanlığı məsələsi bu gün dünyada çox populyardır. Çünki CO2 emissiyasının azaldılması üçün dizel və benzinlə işləyən avtomobillər dövriyyədən çıxardılmalıdır. Onların yerini isə hibrid və elektromobillər tutmalıdır. İstehlakçı marağını artırmaq üçün də istehsalçılar daha ucuz maşın istehsal etməyə çalışırlar. Ona görə də hibrid və elektromobillərin ucuzlaşması xeyli müddət davam edəcək”.