Qadının sürdüyü 6 təkərli “Hummer” Bakı-Quba yolunda belə yandı - YENİ FAKTLAR - VİDEOLAR

Xəbər verdiyimiz kimi, ötən bazar günü, martın 20-də Bakı-Quba yolunun Siyəzən şəhəri yaxınlığından keçən hissəsində altıtəkərli, tüninq olunmuş “Hummer” avtomobili hərəkətdə olarkən qəfil alışıb və tamamilə yanıb. Avtosfer.az virtualaz.org-a istinadən xəbər verir ki, yanğının videogörüntüləri də yayılıb. Avtomobil “BİZON” energetik içkilərinin Azərbaycan distributoruna məxsus olub və şirkətin qadın əməkdaşı tərəfindən idarə edilirmiş. Hadisənin səbəbləri barədə sosial şəbəkələrdə çoxsaylı şayiələr və versiyalar yayılıb. Avtomobilin salonunda quraşdırılmış videoreqistratorun qeydə aldığı görüntülərə əsasən yanğından az əvvəl sürücü qız yanındakı rəfiqəsi ilə rahat söhbət edir. Birdən avtomobildən zərbə səsinə oxşar səs gəlir və sürücü ratsiya ilə onları müşaiyət edənlərə avtomobilin idarəetməsini itirdiyi, mühərrikdə yağın təzyiqinin aşağı düşdüyünü bildirir. Həmin vaxt avtomobil saatda 100 kilometr sürətlə hərəkət edib.

“Hummer”i müşaiyət edən maşındakı şəxs dərhal sürücüyə yoldan kənara çıxıb maşını saxlamaq barədə təlimat verir. Daha sonra onu avtomobilin alışdığı haqda xəbərdar edir. “Səndən sağ tərəfdən alov çıxır” sözlərini eşidən sürücü qız panikaya düşür, ancaq “Hummer”i yolun kənarına çəkib saxlayır. Müşaiyət edən avtomobildən çıxan şəxs yanğınsöndürmə balonu ilə yanğına müdaxilə etməyə çalışsa da alov sürətlə “Hummer” bürüyür. Daha sonra hadisə yerinə yanğınsöndürənlər gəlir. Ancaq yanğını söndürmək mümkün olmur və avtomobil yanaraq sıradan çıxır.

“BİZON” şirkətinin nümayəndəsi 1news.az saytına bildirib ki, avtomobil hadisədən əvvəl texniki baxışdan keçib və tamamilə saz vəziyyətdə olub. “Hadisə qəfildən baş verib, görüntülərdən də məlum olur ki, sürücü yanğını görən kimi avtomobili yolun kənarına çəkib və saxlayıb. Avtomobilin çəni yanacaqla dolu idi və 120 litr benzin istənilən vaxt partlaya bilərdi. Ancaq xoşbəxtlikdən heç kim xəsarət almayıb”.

Şirkət nümayəndəsi deyib ki, avtomobil “General Motors” şirkətinin Bakıdakı servisində texniki baxışdan keçib və heç bir problem aşkarlanmayıb.

“BİZON” şirkətinin nümayəndəliyi bu ilin yanvar ayında Qubadakı “Şahdağ” kurort mərkəzində “BİZON katapulta” adlı ekstrim-şounun təşkilatçılarından biri olub. Bu şou zamanı kreativ kostyumlarda olan 30 iştirakçı elastik kanatla 15 metrlikdən tullanıb.