Yol polisindən sürücülərə xoş xəbər – Cərimə olmayacaq

Noyabrın 1-dən etibarən Azərbaycanda bütün avtomobillərin texniki baxış müddəti başa çatır. Avtomobili texniki baxışdan keçirməyənlər bilməlidir ki, nəqliyyat vasitəsini texniki baxışdan keçirmədən idarə etməyə görə fiziki şəxslər 50 manat, vəzifəli şəxslər 100 manat, hüquqi şəxslər 300 manat cərimə olunur. Avtosfer.az-ın məlumatına görə, qanunvericiliklə müəyyən olunan qrafikə əsasən, 1 yanvar – 30 aprel aralığında “VAZ”, “QAZ”, “Moskviç” və MDB dövlətlərində istehsal olunan digər minik avtomobilləri və motosikletlər texniki baxışdan keçməlidir. Digər xarici ölkələrdə istehsal olunan minik avtomobilləri isə 1 may-31 iyul aralığında texniki baxışa cəlb edilməlidir. Yük avtomobilləri və avtobusların texniki baxış müddəti isə 1 avqust – 31 oktyabr aralığıdır. Qanunvericiliyə əsasən, minik avtomobilləri və motosikletlər istehsal olunduğu vaxtdan hesablanmaqla 5-ci, 7-ci, 9-cu, 11-ci və sonrakı hər il texniki baxışdan keçirilməlidir. Bu zaman nəqliyyat vasitəsinin nə vaxt əldə edilməsinin heç bir əhəmiyyəti yoxdur. Texniki baxışa görə dövlət rüsumu avtomobillər üçün 20 manat, motosikletlər, habelə avtomobil qoşquları üçün isə 10 manat nəzərdə tutulub. Bu rüsumlar mühərrikin iş həcmindən asılı olmayaraq bütün nəqliyyat vasitələri üçün eynidir. Bu il 2007, 2009 və 2011-ci ildə istehsal olunan nəqliyyat vasitələri texniki baxışdan keçməlidir.

Artıq texniki baxış müddəti bu gündən başa çatdığı üçün bəzi sürücülərdə sual yaranır ki, sonradan texniki baxışdan keçməyə gedən sürücüləri cərimə gözləyirmi? Bu sala cavab verən Bakı şəhər Dövlət Yol Polisi İdarəsinin bölmə rəisi Vaqif Əsədov Avtosfer.az-a bildirib ki, bütün sürücülər texniki baxış məsələsinə diqqətlə yanaşmalıdır. Əgər vaxtında keçə bilməyən sürücülər varsa yol polisi onları gecikmədən texniki baxış məntəqələrinə getməyə çağırır: «Diqqətə çatdırmaq istəyirəm ki, texniki baxış üçün müraciət edən sürücüləri müayinə məntəqəsinə cərimə etməyəcəklər. Onlar sadəcə avtomobili texniki baxışa təqdim edəcəklər, heç bir problem aşkarlanmadığı təqdirdə baxış talonu veriləcək. Lakin sürücülər bilməlidirlər ki, yollarda avtomobili idarə edərkən inspektor tərəfindən saxlanılanda cərimə yazılacaq. Qanuna görə, cərimə yazıldığı gündən sonrakı 10 gün ərzində sürücü texniki baxışdan keçməlidir. Keçməzsə, 11-ci gün yenə də ona cərimə yazıla bilər».

Qeyd edək ki, nəqliyyat vasitəsini texniki baxışa təqdim edən hər kəs aşağıdakı sənədləri də təqdim etməlidir:

1) sürücülük vəsiqəsi; 

2) nəqliyyat vasitəsinin qeydiyyat şəhadətnaməsi (nəqliyyat vasitəsi başqasının adına olduqda isə etibarnamə və ya icarə müqaviləsi); 

3) dövlət rüsumunun ödənilməsinə dair sənəd;

4) nəqliyyat vasitəsinin sahibinin mülki məsuliyyətinin icbari sığortası müqaviləsinin Azərbaycan Respublikasının qanunvericiliyinə uyğun olaraq bağlanması faktını təsdiq edən sığorta şəhadətnaməsi. 

Bundan başqa, texniki baxışa təqdim edəcəyiniz əsas şey saz vəziyyətdə olan nəqliyyat vasitənizdir. Nəqliyyat vasitəsinin sazlığına dair tələb “Yol hərəkəti haqqında” Qanunun 1 saylı Əlavəsində verilib. 

Elməddin