Ziya Bünyadov prospektində “ara işləyən” “avtoş” sürücü - ANBAAN VİDEO

Magistral yolda zolaqdan-zolağa hoppanan “Opel” sürücüsü digər maşınların hərəkət istiqamətinə əngəl yaratdı.
Avtosfer.az xəbər verir ki, həvəskar kamerası ilə çəkilən hadisə paytaxtın mərkəzi küçələrindən olan Ziya Bünyadov prospektində baş verib. Kameraya düşən görüntülərdən aydın olduğu kimi “Opel” markalı, 99-HE-436 dövlət nömrə nişanlı avtomobilin sürücüsü yol boyunca hərəkət edən digər nəqliyyat vasitələrinə məhəl qoymadan onların qarşısına keçərək sağa-sola manevr edib  və bununla kifayətlənməyərək əməlini ardıcıl olaraq törədib. Xoşbəxtlikdən önünə keçdiyi, yanından ötdüyü avtomobillərə xəsarət dəyməsə də, anlıq təhlükəli vəziyyətə imza atan sürücü bir neçə dəqiqə avtoxuliqanlıq şousunu nümayiş etdirib. 
Qeyd edək ki,  “avtoşluq” sərgiləyən sürücü “Yol hərəkəti haqqında” qanunun 42-ci maddəsində əksini tapan manevr etmə və 51ci maddədə vurğulanan sağdan ötmə qaydalarına zidd hərəkət etdiyi üçün İnzibati Xətalar Məcəlləsinin 327.1 maddəsinə əsasən, 40 manat cərimə ödəmək məcburiyyətindədir. 

Nərmin Əkbər