ABŞ hərbi gəmilərini Qətərə göndərdi

ABŞ donanmasına məxsus iki gəmi Qətərə göndərilib. Avtosfer.az axar.az-a istinadən xəbər verir ki, bu barədə Qətərin rəsmi informasiya agentliyi məlumat yayıb. Gəmilər Qətər donanması ilə birgə hərbi təlimlərdə iştirak edəcək. ABŞ Prezidenti Donald Trampın Doha əleyhinə “terrorizmə dəstək verir” sözlərinə baxmayaraq, hərbi gəmilər Həməd limanına (Dohanın cənubunda) ötən gün çatıb. ABŞ-Qətər hərbi təliminin əvvəlcədən razılaşdırılmış təqvim üzrə keçirilməsi diqqətdən qaçmayıb. Hazırda Qətər terrorizmi dəstəklədiyi iddiası ilə Səudiyyə Ərəbistanı başda olmaqla, bir sıra ölkələrin siyasi və iqtisadi blokadası altındadır.