Alverçilərin "qara günləri" - Avtomobilin keçmişi ilə TANIŞ OL

Azərbaycanda avtomobillərin ölkə ərazisində törətdiyi qəzaların keçmişinə baxmaq artıq mümkün olacaq. Bununla bağlı "SMSRadar" yenilik edib. Bunun üçün avtomobilin vin kodu (nəqliyyat vasitəsinin 17 simvoldan ibarət olan unikal kodudur. Kodda istehsalçı və nəqliyyat vasitəsinin xarakteristikaları haqqında informasiya və buraxılış ili göstərilir) və 3 AZN ödəniş tələb olunur. Avtomobillərin ölkə ərazisində törətdiyi qəzalar rəsmi sistem üzərindən təqdim edilir. 

Bəs Avtomobilin qəza  törətdiyi proqramda görünsün deyə nə edilməlidir? Eyni zamanda bu yenilik avtomobillərin alqı-satqısı zamanı sui-istifadə hallarına necə təsir edəcək? 

Avtosfer.az-ın məlumatına görə, mövzu ilə bağlı nəqliyyat eksperti Elməddin Muradlı Redaktor.az-a açıqlamasında bildirdi ki, bu kimi texnoloji yeniliklər bir çox ölkələrdə var və istifadə olunur:

"Azərbaycanda da bu SMS xidməti ilə biz uzun müddətdir əməkdaşlıq edirik və orada kifayət qədər peşəkar insanlar fəaliyyət göstərir, bu sahədə həmişə bütün yeniliklərin tətbiqinə çalışırlar, öz biliklərini, bacarıqlarını nümayiş etdirirlər. Xidmət də çox gözəl bir yeniliyə imza atdı. Azərbaycanda avtomobil alverçiləri, dəllallar bütün dövrlərdə yalançı vədlərlə, sözlərlə həmişə alıcıları aldatmağa çalışırlar və bu da sözsüz ki, bütün alıcıları narahat edir. Əgər narahatçılıq varsa, bunun qarşısını almaq üçün bir yol da tapmaq lazım idi. Bunu da "SMSRadar" xidməti tapdı. Əslində, bildiyim qədər bir ildən ki, çoxdur bu layihənin üzərində işləyirlər. Bizim başqa dostlarımız da belə bir sistem qurmağa çalışdı. Ancaq biz danışıq əsnasında öyrəndik ki, artıq "SMSRadar" xidməti bu layihəyə qədəm qoyub və artıq işə düşüb".

Elməddin Muradlının sözlərinə görə, bu xidmətdən sonra alverçilərin "qara günləri" başlayacaq:

"Amma bunun üçün mütləq baş verən hadisə sığorta hadisəsi kimi qeydiyyata alınmalıdır. Məlumat sığorta bazasına getməlidir ki, "SMSRadar" xidməti də bazadan onu götürə bilsin. Ancaq gizlədilmiş o qədər hadisələr var ki, bunları artıq sistemdə görmək bir az çətindir. Yalnız sığorta qeydiyyatı aparılandan sonra həmin qəza hadisələri sistemə düşür və beləliklə, vətəndaş da gələcək tarixçədə bunu görə bilir. Çox vaxt bəzi sürücülər qəza törədib, öz aralarında razılığa gəlirlər. Bu halda artıq sistem onu görmür və baza şəklində formalaşmır".