ASCO tarixində ilk dəfə iki xanımı motorçu kimi işə qəbul edib

"Azərbaycan Xəzər Dəniz Gəmiçiliyi” QSC-nin (ASCO) gəmiçilik sektorunda gender bərabərliyini və inklüzivliyi təmin etmək məqsədilə mühüm addım ataraq, ilk dəfə iki xanımı – Röya Ələkbərlini və İradə Astanovanı motorçu kimi işə qəbul edib.

Avtosfer.az ASCO-ya istinadən xəbər verir ki, onlar Azərbaycan Dövlət Dəniz Akademiyasının (ADDA) Gəmi energetik qurğularının istismarı mühəndisliyi ixtisasının 2024-cü il məzunlarıdırlar. İradə Astanova sözügedən ixtisasın Azərbaycan dili bölməsində, Röya Ələkbərli isə ingilis dili bölməsində təhsil alıb. Hər iki xanımın hədəfli gələcəkdə baş mexanik vəzifəsinə yüksəlməkdir.

ASCO-nun insan resurslarının idarə edilməsi qaydalarına əsasən, test imtahanı və müsahibəni uğurla keçən bu xanımlar donanmanın işçi ehtiyaclarına uyğun olaraq işə qəbul olunublar. İradə Astanova “Prezident Heydər Əliyev” tankeri, Röya Ələkbərli isə “Culfa” tankerində fəaliyyətə başlayıb. Bu gəmilər Xəzər dənizinin ən böyük tankerlərindən sayılır.

Qeyd edək ki, bundan əvvəl ASCO inklüzivlik prinsiplərini əsas götürərək, ADDA məzunu olan ilk xanım matrosunu işə qəbul etmişdi. Matros Nuranə Əkbərzadə hazırda RoPax tipli “Zərifə Əliyeva” gəmi-bərəsində uğurla çalışır.