AST Telman beynəlxalq axtarışa verildi

Moskvanın Basman rayon Məhkəməsi Azərbaycan əsilli rusiyalı biznesmen Telman İsmayılov barəsində həbs qətimkan tədbiri seçib. "Report" "İnterfaks"a istinadən xəbər verir ki, bunu onun vəkili Marina Rusakova deyib. T.İsmayılovun özü prosesdə iştirak etməyib və həbs qətimkan tədbiri qiyabi formada çıxarılıb. Vəkil bildirib ki, T.İsmayılov iki nəfərin qətlində şübhəli bilinir və həbs qətimkan tədbiri həmin cinayət iş üzrə qəbul edilib.

M.Rusakovanın sözlərinə görə, hüquqlarını müdafiə etdiyi biznesmen həmçinin qanunsuz silah dövriyyəsində də ittiham olunaraq beynəlxalq axtarışa verilib: "Məhkəmə həbs qətimkan qərarını qiyabi formada qəbul edib. Biz qərardan apellyasiya şikayəti vermişik. Noyabrın 15-də Moskva Şəhər Məhkəməsi şikayətimizə baxacaq".