Avtomobil vurub dedilər, öldürüldüyü üzə çıxdı

Martın 6-da Sumqayıtda meyiti tapılan qadının öldürüldüyü məlum olub. Sumqayıt şəhər Polis İdarəsindən Lent.az-a verilən məlumata görə, H.Z.Tağıyev qəsəbəsində beton yolun kənarında 1968-ci il təvəllüdlü Gülnaz Dadaşovanın üzərində xəsarətləri olan meyiti tapılıb. İlkin olaraq bildirilib ki, 48 yaşlı qadın naməlum avtomobil tərəfindən vurulub və polis idarəsində Cinayət Məcəlləsinin 264-cü (yol qəzası yerindən qaçma) maddəsi ilə iş başlanılıb. Aparılan araşdırmalar nəticəsində qadının baş və boğaz nahiyələrindəki xəsarətlərin döyülməyə xas olması müəyyənləşdirilib. Məlum olub ki, G.Dadaşovanı həmyerlisi, 1975-ci il təvəllüdlü Elman Əhmədov döyərək qətlə yetirib. E.Əhmədov tutulub.

Faktla bağlı Sumqayıt şəhər Prokurorluğunda araşdırma aparılır.