Avtomobildə gizlədilən 33 ədəd mobil telefon müsadirə edildi

Dövlət Gömrük Komitəsi (DGK) Xaçmaz Gömrük İdarəsinin "Samur" gömrük postunun idxal nəzarəti zonasına Rusiya istiqamətindən daxil olan Azərbaycan vətəndaşının idarə etdiyi "VAZ 21043 " markalı nəqliyyat vasitəsinə gömrük baxışı keçirilib. Bu barədə Avtosfer.az-a DGK-dan məlumat verilib. Məlumata görə, yoxlama zamanı nəqliyyat vasitəsinin arxa tavan hissəsindən, günlüyündən və salonundakı geyim əşyalarının arasından gömrük nəzarətindən gizlədilən 4 ədəd "Samsung" markasına aid SM-A320F/DS model, 29 ədəd "BQ" markasına aid STEP model mobil telefonlar, yük yerindən isə 36 ədəd üzərində "BQ", 6 ədəd üzərində "Samsung Galaxy A3 2017" və 1 ədəd üzərində "Samsung Galaxy Grand Prime" yazıları olan boş mobil telefon qutuları, 7 ədəd "Samsung" markalı adapter başlığı, 7 ədəd "Samsung" markalı USB kabel, 7 ədəd "Samsung" markalı qulaqcıqlar aşkar edilib.

Faktla bağlı araşdırma aparılır.