Avtomobildən 254000 ədəd siqaret müsadirə edildi – FOTO

Xaçmaz Gömrük İdarəsinin  əməkdaşları 3 fakt üzrə 254 000 ədəd siqaretin qaçaqmalçılıq yolu ilə ölkə ərazisinə keçirilməsinin qarşısını alıb.

Bu barədə Dövlət Gömrük Komitəsindən (DGK) Avtosfer.az-a bildirilib. 

İdarənin “Xanoba” gömrük postunun gömrük nəzarəti zonasına Rusiya Federasiyası istiqamətindən daxil olan Azərbaycan Respublikası vətəndaşının idarə etdiyi nəqliyyat vasitəsinə gömrük baxışı keçirilib. Yoxlama zamanı avtomobilin salonundan və ehtiyat təkərinin içərisindən gömrük nəzarətindən gizlədilən 96600 ədəd siqaret aşkar edilərək götürülüb.

“Xanoba” gömrük postunun gömrük nəzarəti zonasına Rusiya Federasiyası istiqamətindən daxil olan Azərbaycan Respublikası vətəndaşının idarə etdiyi  digər bir avtomobildən isə 60000 ədəd siqaret aşkar edilib.  

Gömrükçülər  qaçaqmalçiliq yolu ilə ölkə ərazisinə gətirilən siqaretləri  avtomobilin salonu və yük yerindəki örtüklərin altından aşkar edib.

“Xanoba” gömrük postunun idxal minik xəttində Azərbaycan Respublikası vətəndaşının idarə etdiyi daha bir nəqliyyat vasitəsinə keçirilən gömrük baxışı zamanı isə avtomobildən gömrük nəzarətindən  gizlədilən 97 400 ədəd siqaret aşkar olunaraq götürülüb.

Hər 3 faktla bağlı araşdırma aparılır.