Avtomobildən 32600 ədəd siqaret çıxdı -  Biləsuvarda

Dövlət Gömrük Komitəsinin (DGK) Biləsuvar Gömrük İdarəsinin Gömrük hüquqpozmalarına qarşı mübarizə şöbəsinə aksiz markası ilə markalanmalı olan məhsulları belə marka olmadan satma və satış məqsədilə saxlama barədə əməliyyat məlumatı daxil olub. 

Bu barədə Avtosfer.az-a DGK-nın mətbuat xidmətindən məlumat verilib.

Məlumata əsasən, “Hyundai Sonata” markalı minik avtomobilində aksiz markası ilə markalanmayan külli miqdarda tütün məmulatının olduğu və həmin avtomobilin tütün məmulatını Salyan rayonunun Şorsulu kəndində satmaq məqsədilə Biləsuvar şəhərindən Salyan rayonu istiqamətində aparılacağı bildirilib.

Əməliyyat tədbiri nəticəsində avtomobil saxlanılıb. Ona baxış zamanı yük yerində aksiz markası ilə markalanmayan 32600 ədəd “Megan”, “Manchester”, “Amore”, “M1” və “Monus” markalı siqaretlər aşkar edilərək götürülüb.

Faktla bağlı araşdırma aparılır.