Avtomobillərdən silsilə oğurluq edən cəzalandırıldı – HÖKM

Bu gün Bakı Ağır Cinayətlər Məhkəməsidə oğurluqda təqsirləndirilən 1994-cü il təvəllüdlü Emil Miriyevin cinayət işi üzrə məhkəmə prosesi başa çatıb. Teleqraf.com xəbər verir ki, hakim Mahmud Ağalarovun sədrliyi ilə keçirilən prosesdə Emil Miriyev 7 il müddətinə azadlıqdan məhrum edilib. İttihama görə, Suraxanı rayon Polis İdarəsi və 33-cü polis bölməsi əməkdaşlarının birgə keçirdikləri əməliyyat-axtarış tədbirləri nəticəsində Emil Miriyev saxlanılıb. O, oğurladığı “Runna” markalı avtomobili sürərkən şəhərdə qurulan təhlükəsizlik kameraları vasitəsi ilə yeri müəyyən edilərək həbs edilib. 

Emil Miriyev oktyabrın 1-nə keçən gecə Yeni Günəşli qəsəbəsində yaşayan Esmira Cəfərovaya məxsus “Hyundai” markalı avtomobildən şüşəni sındırmaqla müşahidə kamerası, avtomobilin texniki pasportu, sürücülük və şəxsiyyət vəsiqələri oğurlamaqda, Samir Ağayevə məxsus “BMW” markalı avtomobildən, şüşəni sındırmaqla oğurluğa cəhddə şübhələ bilinib. 

Müəyyən edilib ki, o, oktyabrın 29-na keçən gecə Yeni Günəşli qəsəbəsində yaşayan İlkin Yusubova məxsus “Chevrolet-Cruze”, Ramil Əliyevə məxsus “Mercedes”, Bahadur Beydiyevə məxsus “Niva”, Rafiq Kərimova məxsus “Mercedes” markalı avtomobillərdən, şüşəni sındırmaqla mobil telefon, pul, səsgücləndirici, maqnitafon və digər əşyalar oğurlayıb. Rizvan Həsənova məxsus “Toyota-Prado” markalı avtomobildən isə şüşəni sındırmaqla oğurluğa cəhd edib.