Avtomobillərin hərəkəti bərpa olundu - Quba-Xınalıq yolunda

Quba-Xınalıq yolunun 35-ci kilometrliyində dağ uçqunu nəticəsində bağlanan yolda avtomobillərin hərəkəti bərpa olunub. Bu barədə Avtosfer.az-a "Azəravtoyol" Açıq Səhmdar Cəmiyyətinin mətbuat xidmətinin rəhbəri Anar Nəcəfli məlumat verib. O bildirib ki, oktyabrın 28-də günorta saatlarında Quba-Xınalıq yolunun 35-ci km-də dağ uçqunu baş verib. Nəticədə iri qaya parçaları yolun hərəkət hissəsinə tökülərək hərəkətin məhdudlaşmasına səbəb olub.

Dərhal əraziyə yolun 32-ci km-də olan növbətçi texnikalar, canlı qüvvə cəlb olunub və qısa müddət ərzində yol qaya parçalarından təmizlənərək hərəkət tam bərpa olunub.