Avtomobillərin icbari sığortası ilə bağlı dəyişiklik ediləcək? – RƏSMİ AÇIQLAMA

Uzun müddətdir Avtosfer.az-ın sosial şəbəkə hesablarına, eləcə də “WhatsApp” nömrəsinə sürücülər tərəfindən eyni məzmunlu şikayət daxil olur. Avtomobil idarəçiləri bildirir ki, artıq texnologiyanın irəlilədiyi bir dövrdə hələ də maşının sığorta müddətini hansısa saytdan, tətbiqdən öyrənə bilməyin mümkünsüzlüyü heç də anlaşılan deyil. Halbuki bir müddət əvvəl sürücülər üçün həm Dövlət Yol Polisinin rəsmi saytında, həm də mobil tətbiqdə texniki baxışın müddəti ilə bağlı məlumatları əldə etmək məsələsi həll olunmuşdu. Bircə qalır sürücülərin icbari avtomobil sığortasının müddətini çevik şəkildə öyrənmələrinin əlçatanlığını təmin etmək. Çünki İcbari Sığorta Bürosunun hazırda mövcud olan saytında yalnız müqavilənin hansı şirkətlə bağlanılması və qüvvədə olması göstərilir.

Mövzu ilə bağlı İcbari Sığorta Bürosuna sorğu göndərdik. Qurumdan Avtosfer.az-a bildirildi ki, mövcud məsələ ilə əlaqədar hansısa yenilik hələ ki gözlənilmir. Sürücülər 9707 nömrəsinə SMS göndərərək, eləcə də “services.isb.az” saytından sığorta müqavilələrinin müddətinin bitib-bimədiyini öyrənə bilərlər.

Səfər