"Ay ərzində 18 təyyarə reysi həyata keçirilir" - İrandan Azərbaycana

Mədəniyyət və turizm naziri Əbülfəs Qarayev İran İslam Respublikasının Azərbaycandakı səfiri Möhsün Pak Ayini səlahiyyət müddətinin bitməsi ilə əlaqədar qəbul edib.

Avtosfer.az xəbər verir ki, bu barədə nazirliyin informasiya və ictimaiyyətlə əlaqələr şöbəsindən apa-ya verilən məlumata görə, Ə. Qarayev iki ölkə arasında həm turizm, həm də mədəniyyət sahəsində əlaqələrin sürətlə inkişaf etdiyini vurğulayaraq, son illər Azərbaycanda İran turistlərinin sayının kifayət qədər  artdığını bildirib və bu amilin turizm şirkətləri arasında əməkdaşlıq əlaqələrinin inkişafına şərait yaratdığını deyib.

Görüş zamanı bu il İranda təşkil olunacaq Azərbaycan Mədəniyyət Günləri haqqında müzakirə aparılıb. Qeyd olunub ki, yaxın günlərdə Azərbaycan nümayəndə heyəti tədbirin keçiriləcəyi şəhərlərdə infrastrukturla tanışlıq məqsədilə İrana səfər edəcək.

İran səfiri bildirib ki, hazırda ölkəsindən Azərbaycana ay ərzində 18 təyyarə reysi həyata keçirilir və turistərin artan marağını nəzərə alaraq reyslərin sayının artırılması zərurəti yaranıb.