Azərbaycan dəmir yolları elektrikləşdirilməlidir - Ekspert

Bakı-Tbilisi-Qars (BTQ) dəmir yolu hazırda Avropa ilə Asiyanı birləşdirən və sanksiyalara məruz qalmayan yeganə strateji marşrutlardan biridir. Zəngəzur dəhlizinin açılması isə bu xətti tamamlayaraq regionun tranzit imkanlarını genişləndirəcək. Avtosfer.az xəbər verirki, nəqliyyat eksperti Rauf Ağamirzəyev AZƏRTAC-a açıqlamasında bildirib ki, növbəti dörd il ərzində BTQ-nin real potensialı daha aydın görünəcək.

Onun sözlərinə görə, bunun səbəblərindən biri Türkiyədə həyata keçirilən Divin-Qars–Gürcüstan dəmir yolunun ikinci xəttinin elektrikləşdirilməsinə başlanmasıdır.

“Bu yenilik həm xəttin buraxılış qabiliyyətini artıracaq, həm də həmin marşrut üzrə yükdaşıma xərclərinin azalmasına təsir göstərəcək. Elektrikləşdirilmiş dəmir yolu ekoloji cəhətdən təmiz nəqliyyat növü hesab olunur ki, bu da marşrutun uzunmüddətli dövrdə rəqabət qabiliyyətini artırır”, - deyə Rauf Ağamirzəyev vurğulayıb.

Ekspert əlavə edib ki, Ələtdən Gürcüstan limanlarına və Türkiyə sərhədinə qədər olan dəmir yolu artıq tam elektrikləşdirilib və Azərbaycan dəyişən cərəyana keçidi təmin edib: “Bu isə təqribən 20 faiz daha ucuz daşınma deməkdir. Türkiyə ərazisində aparılan layihələr – xüsusilə də Qars–İğdır–Dilucu–Azərbaycan sərhədi dəmir yolunun ikixətli və elektrikləşdirilmiş şəkildə inşası bölgədə yeni tranzit imkanları üçün ciddi siqnaldır. Hazırda Ələtdən Türkiyə sərhədinədək uzanan dəmir yolunun təkmilləşdirilməsinə diqqət artırılıb. Gələcəkdə bu xəttin də tam elektrikləşdirilməsi və dəyişən cərəyana keçidi zəruridir. Azərbaycanın bütün dəmir yolları elektrikləşdirilməlidir ki, ölkə bütün marşrutlarda rəqabətədavamlı olsun və qlobal çağırışlara tam hazır vəziyyətdə qala bilsin”.