Azərbaycana zərbə endirməyi təklif edən deputat indi də Çini hədəfə aldı

Çinin hazırda Rusiyada avtomobil yığması müstəmləkə sistemninə əsaslanır. Ələ keçirilən ərazidə ucuz işçi qüvvəsi, aşağı vergi və çirklənən ətraf mühit mövcuddur. 

Avtosfer.az xəbər verir ki,  bu fikri Rusiya Dövlət Dumasının deputatı, iqtisadçı Mixail Delyaqin səsləndirib.

Deputat bildirib ki, satışdan əldə edilən gəlir metropoliyaya (Çinə) aparılır, əlavə dəyər yaradan hissə mütləq şəkildə özlərində formalaşır. İnhisarçılıq, bahalı kreditlər, müstəmləkəçi gömrük-vergi sistemi cəzasızlıq mühitində istehsalı bloklayır.

Delyaqinin qənaətinə görə, ölkəyə xammal gətirilməsi vergidən azaddır. Lakin onun emalına ciddi vergi qoyulur ki, bu da son nəticədə emalı rentabelsiz edir. 

Qeyd edək ki, Mixayıl Delyagin 2022-ci il 28 mart tarixində “Rossiya 1” telekanalında yayımlanan verilişdə Azərbaycana qarşı təcavüzkar müharibəni başlamağa açıq çağırışlar edərək ölkəmizin enerji infrastrukturu və neft sənayesinin məhv edilməsi üçün taktiki nüvə silahından istifadə olunması barədə təxribat xarakterli çıxış edib.

Bu səbəbdən Azərbaycan onun barədə "İnterpol" vasitəsilə beynəlxalq axtarış elan edib.

Ertəsi gün Delyaqin və onun partiyası səfirlik vasitəsi ilə Azərbaycandan üzr istəyib.

Vüqar Yaşaroğlu