Azərbaycanda 14 avtomobil körpüsü tikilib, 8-i təmir edilib – FOTO+VİDEO

“Azəravtoyol” ASC-də 2016-ci ilin yekunları və 2017-cı il qarşıda duran vəzifələrin icrasına həsr olunan iclas keçirilib. Avtosfer.az xəbər verir ki, cəmiyyətdən verilən məlumata görə, “Azəravtoyol” ASC-nin sədri Saleh Məmmədov bildirib ki, 2016-cı il ərzində 880 km uzunluğunda ümumi istifadədə olan yeni avtomobil yolları, prospekt və küçələr tikilib, yenidən qurulub və təmir olunub, həmçinin 14 ədəd yeni avtomobil körpüsü tikilib, 8 ədədi isə təmir edilib.

Bundan başqa, ötən il ərzində Bakı şəhəri Binəqədi, Nizami, Yasamal, Xətai, Nərimanov, Nəsimi, Xəzər, Sabunçu, Suraxanı, Qaradağ və Səbail rayonlarında 48 adda prospekt və küçə yenidən qurulub və təmir olunub, həmçinin 4 ədəd piyada keçidi tikilib, 1-i isə təmir edilib.

S.Məmmədov ümumi uzunluğu 515 km təşkil edən 21 kəndlərarası və 7 qəsəbələrarası avtomobil yollarının tikintisi, qəzalı vəziyyətə düşən 1 körpünün bərpası işlərinin başa çatdırılması barədə məlumat verib.

"Bu dövr ərzində ümumilikdə 1 mln. 21,8 min ton asfalt-beton istehsal edilib, 56,2 min ton bitum və 4,5 min ton mazut istifadə edilib", - deyə S.Məmmədov əlavə edib.